英國影結婚相記二．預備篇

去外國影結婚相，若等於計劃一次外國旅行。沒有攝影師，但只要有一支夠高及穩固的腳架，還是可以自拍，即使用一般相機效果也不會太差。

未來太太和攝影師在英國讀書，至少解決了住的問題。要預備的東西包括：

1. 由於我地都唔係專業Model，影相一定好生硬。朋友P建議，影相前一定要掀多些結婚雜誌同Model相，學下人家點擺Post同點用眼神，將好睇的、特別的記下然後返屋企練習。呢個建議係幾有用！

2. 西式禮服

英國借婚紗過百鎊走唔甩；淘寶網雖然便宜，但呎碼一定不稱身，最好預早訂一件大大碼，然後改細一點。最重要是預備一條長頭紗，頭紗唔夠長，係拍唔到以上這張相。

多謝攝影師Paul Yeung的女朋友Amanda幫忙，有多對手幫忙撩起頭紗。

3. 中式禮服

多得淘寶網，幾百元已可以買套中式禮服，在好歐洲的地方穿唐裝拍照係幾好玩。如果只可以拍一款，我一定揀唐裝多過婚紗西裝。

4. 道具

有道具就唔會咁單調，報界朋友拍一齊睇報紙的相。未來老婆鍾意太陽花，特登去農場買一支一鎊，四支四鎊，又大又靚的太陽花（上圖）。

攝影師Paul Yeung有支Q版Lace遮，畀我地玩「跳傘」：

但最正的道具，是從天降下來的禮物，不是我們刻意預備的。拍照期間，碰巧有新開張的餐廳派紅汽球，我們拿了一支，所以才拍到以下的照片，做到向上飄的效果：

還有這一張：

我們相識於讀書，當然少不了書本，我們選了這張做請帖的相：

另一個幾好的道具是皮喼，借用朋友P & A的一張相，同樣是在牛津拍攝：

5. 化粧

若要找專人一早上門化粧，聽聞至少也要2,300鎊。省錢則可以考慮Debenham等百貨公司的化粧專櫃，大約5, 60鎊，還有化粧贈品送，不過要提早到專櫃預約，反正亦無人認得你，一定唔驚尷尬。

當然若天生麗質，不化粧也沒有大問題。因為拍結婚照，最重要是過程好不好玩、開不開心、難不難忘，十級靚還是五級靚，真係唔多重要。

6. 留意天氣及計劃行程

大部分人肯定不知道，英國博物館、古舊的政府建築，都有機會可以免費暫借拍結婚照，不妨試試send個email問問。

成功的例子包括：
一．朋友P & A得到倫敦的Natural Science Museum的批准，閉館後讓他們留館拍半小時。

二．我們亦得到牛津Town Hall的批淮，讓我們在沒有人使用的時間，到大堂拍半小時（上圖）。呢個Hall真係靚到爆。

我們以最經濟的方法拍攝，男的穿普通的西裝、女的借親朋戚友用過的婚紗，沒有特別講究甚麼款式；頭紗和中式禮服則在淘寶網訂，然後由我帶過英國。

事後又發現，只要背景的建築和風景夠靚，禮服設計cutting細節不太重要，就連我這挺貨色，也拍得不太醜。當然亦要多謝Paul Yeung化腐朽為神奇。

正式來說，英國行一共拍了三天半，一天在倫敦玩自拍、兩天在牛津由Paul Yeung認真操刀、半天到Aylesbury、曾接待法皇路易十八的皇宮，Hartwell House玩自拍。後來亦趁La Medocaine單車賽，一邊踩車一邊自拍。

下次講講，如何用一部六年前出的Panasonic LX3數碼機仔及腳架在倫敦自拍。

PS：據了解行情的朋友說，若要在英國聘一個攝影師拍一天，公價是750英鎊（大約一萬元），若果有懂攝影的朋友，不如請他去英國旅行換免費拍照好了。