最近新界東北發展的討論熾熱，但原來我又大個仔，係從來未去過政府要發展的東北鄉郊，難得前港隊成員兼單車教練Kenji梁，上周日會帶個單車團探索新界東北，我拉衫尾參加一分，搵埋跑友Raymond一起去。
Kenji去年北海道踩車認識，退役後幫一些非政府機構帶慈善單車團，他上年去北海道為「點滴是生命」的籌款單車團試路，我有幸跟他踩過幾次。Kenji黎近又會同旅行社同航空公司合作辦單車旅遊團，有機會都會同讀者介紹下。
可惜路線唔經生產「黑旋風忍者」同「愛膚堅」華仁行化工廠，若不是仁兄Heterogeneous的
「調查報道」，敢肯定大多數人都不會知道，黑旋風殺蟲水的工廠不在日本，而是在古洞，這篇報道給蘋果日報一點
線索追查廠的背景，令發展局政治助理何建宗丟官，因為黑旋風的老闆正正是何家，廠在古洞有不少地皮。
香港試旦搵個官都有樓有田，怪不得候志強話，人到中年乜都無，真係廢人一個，唔死都無用，包括小弟也。
Kenji帶的路線，是不會經過古洞，一行人在「鴻陶豆品店」hea左好耐。這裡的豆腐花超便宜，十元薑汁豆花豆漿吃到飽。吃完豆花自助餐，我同Raymond心血來潮，不如離隊看看附近有甚麼景點。
我們兩人沿河上鄉路，跟住出上水火車站的小巴路一直踩，到左古洞都唔知，直至發現「華仁行化工廠」原來就係路邊，梗係要yeah下影相留念。
唔駛用劍o既，踩單車去就得！呢張貼左FB一日，呃左69個Like。
我看過《蘋果日報》，依稀記得陳茂波塊地在黑旋風化工廠附近。一場來到，沒有理由不去看看備受爭議的農地？我們兩人見村民就問，大約有一半村民知道該地位置，指該地在一間村教堂旁。
農田沒有地址，Raymond用電話google報紙出過的圖片，應該有一幢白色、一幢黃色的建築和一條水渠。我們在教堂旁看到前方有類似的建築，但引領的小路入口可能屬渠務處管，一米高的閘鎖了。
就在此時，聽到有喇叭聲，有古洞關注組帶大專生來考察，證實我們找對路了。咁多人想睇這塊地，古洞村真係應該諗諗，在這塊地前楝個牌做景點，等大家唔駛搵得咁辛苦。
最後我們二人沿路踩回上水火車站。單車要卸下前輪才可以進火車，我們兩個無甚單車經驗的「低能仔」拆來拆去都搞唔掂，人地幾秒搞掂，我地拆左幾分鐘，最後我諗到條屎橋，將單車輪放氣，便可以穿過剎車位取出來了。
Raymond覺得無理由咁低能，因為身邊的人幾秒就搞掂。他問其他單車客後，我們才知道Mountain Bike的Blake，其實很容拆開！
枉我還穿了件Kenji送的「鎮洋」單車衫（鎮洋乃台灣名牌大廠，Giant捷安特單車的香港代理公司），去到火炭的YY Bike鋪頭還車，還被老細發現這樁糗事，呢鋪真係影衰「鎮洋」囉。
今次發現，新界東北單車團本土旅遊真係有得搞，吸下新鮮空氣、食下豆腐花，仲可以有睇埋生產黑旋風、愛膚堅的化學基地及搞到滿城風雨的波叔農地。Kenji真係要諗諗啦！
