山中湖及河口湖．值100分的民宿「Ringa & Ringo」

富士山附近有富士五湖，分別是山中湖、河口湖、西湖、精進湖及本栖湖。五湖之中，以河口湖最多旅客，旅遊點也最多；山中湖距離富士山最近，也是日本毅行者的終點，其餘三個湖較細小，精進湖聽個名就唔多吉利。Lonely Planet也只介紹河口湖，其實山中湖一點也不比河口湖差，至少湖上有天鵝。

遊富士山的翌日，我們由山中湖的民宿駕車到河口湖，不過唔知點解，唔知個GPS定係路標，中段指示唔清楚，搞到我地駕多左一小段路，好彩日本無人抄牌，一見有位即刻掉返轉頭、撥亂歸正返回原路。

河口湖與山中湖差不多，但沿岸多很多café、gallery（見圖）及商店，湖邊行人路也是斷斷續續。其中有間鋪頭賣的食物幾特別，有件類似七星伴月、叫「蓬來山」的糕點，賣相都幾搞笑，但價錢就賣200幾元港紙，所以我地只買了類似雪糕的冰豆腐食，日本七星伴月影底佢算數了。

貴公好想去「河口湖生活館」，以為有些關於河口湖、富士山文化之類的展品，但去到先發現，原來所謂「生活館」，即係買乾貨兼搞烹飪班的地方，完全係同生活息息相關。我仲問個職員，呢度係咪Museum？個職員唔鬼識聽英文。但行埋後門都無料到，原來我地全部搞錯晒。

隊友貴公、Pat同Sherin都係當日下午返新宿，最後拿拿林經忍野（呢個地名都幾好笑，唔知當地居民係咪好忍得）返山中湖，中間又落車去了間寫上「富士山」的神社觀光。仲有大把日子的我，留在山中湖租多半日單車踩，對住個富士山踩單車，見景靚就停低影相，真係好鬼爽！曾經踩單車遊日本幾個月的律師D，真係無介紹錯。

人海茫茫，竟然踩踩下撞到毅行者第一段跌落屎坑果條友！呢個人真係我的災星，見完佢無耐我就ｘ街翻車。以後真係要裝個GPS係佢到，佢一黎就要即刻閃！

最後終於都要離開山中湖同富士山，原來就在毅行者下一個周日，有山中湖半馬拉松！令我曾經考慮半個鐘，不如留係山中湖休息下，然後參加埋山中湖半馬算數囉，但因為買了火車證，無理由咁樣浪費佢，咁就蝕晒水！唯有下次才參加山中湖半馬。

最後一定要提我們住的山中湖民宿Ringa & Ringo。都係Sherin眼光獨到，呢間民宿真係正爆，400蚊港紙一晚，西式精緻的裝修，每天都有食到飽晒的西式早餐，送埋大大個富士山陪你食！老闆娘成本貴子好好人、唔駛錢幫我地幾個洗晒污糟衫（仲洗埋Pat舊相機電同SD Card。唔好意思，我唔記得係個腰包度攞返出嚟！）、英文又講得、仲車埋我地去租車同巴士站！

我在布吉都有寄post card比老闆娘，謝謝她為我們在富士山留下美好回憶。貴子話，間民宿已營業了20多年，她是3年前才由uncle度接手經營，佢每年都會去英國旅行（說不定明年又會在英國撞到）。

在富士山下有間屋、順道經營民宿，結識來自世界各地的朋友，做自己喜歡的事，然後不時去外國旅行。生活如此、夫復可求？