日本毅行者之四．謝謝日本樂施會及support Sherin

這次毅行者，完全體驗日本人認真、一絲不苟的性格，婦女義工很多都穿上和服、男義工穿上武士裝束為參加者打氣。可能樂施會是外國機構、加上活動仍未搞起，也少了一般日本機構活動的繁文褥節，沒有出現村上春樹所形容：「每次日本馬拉松，都要等政府領導講粒幾兩粒鐘廢話，先可以起步；場刊要列晒所有參加者係乜體育會。」唯一的講者，只是幫日本搞毅行者的香港莊陳有。

日本每個check point有合味道杯麵、energy gel，不少check point也有飯團，金莎、雪莎朱古力，及沿途的大量汽水機，雖然未必很豐富，但靠check point的食物捱到終點實無問題！

另一項德政是寄存行李服務，幫你把需要的行李送到check point4、7及所有行李到終點，方便沒有支援的隊伍。相反香港毅行者差好遠囉！得check point 7鉛礦坳有生麵王（不是日清！），其餘站的食物實在簡單得很，05年行到尾二的check point荃錦坳，寧願唔食肚餓，都唔想再食check point的食物！當然，一分錢一分貨，鬼叫香港毅行者報名費平四倍，兼且support較日本容易，唔靠check point食物唔駛死。

沿途的標距顯示、反光標貼、指示的綠色尼龍繩也十分充足，即使在九曲十三彎的「足柄萬葉國家公園」也沒有迷路，唯一要彈的，只有落金時山那一段指示欠佳，久久也沒有反光標貼。

日本原本預有200隊參加，但最終只有176隊組成，其中更有37隊來自香港，出發當日的起點小田原城，差不多變了香港，六點鐘去吉野家食早餐，成間吉野家全部係香港，仲撞到熟人Sally！！！甚少日本人參加的確有點意外，中大呂大樂同我講過，日本人自發做善事的熱情冷淡，若不是學校或公司安排，日本人是很少個別自發參與活動，所以日本學者覺得，香港學生會放假去賣旗係不可思義，這種募款模式在日本行唔通。

兼且樂施會在日本是新組織，我在京都、廣島問人，沒有人知道日本毅行者係乜。日本樂施會說，目前仍未知明年會否繼續舉辦。我當然希望繼續搞下去，讀者有興趣，可以到www.oxfam.jp網頁了解。

最後當然要多謝Sherin，一個頂十個的support。單是她選的民宿，駕車載我們上富士山、河口湖，令此行劃上圓滿的句號，還有陪行最後一段、及設計的隊衣！