日本毅行者之一：真係好金的金時山

時間過得很快，17天的日本毅行者之旅已於上周四結束，去年12月找腳報名遞表，還好像昨天才發生。007隊拉雜成軍、缺乏操練，但仍然以34H32M衝線，在176隊中排44名，超額原成目標，還趕得及在周六天黑前，在明神山看富士山及山中湖的日落。現在回想．也令人神往。



日本毅行者的安排一流，義工熱情認真，女義工更絕不欺場，更穿和服派飯團，check oint7的靜岡縣駿河小山町更有「溫泉」！整段路九成是鬆軟的泥路，即使連續行30多小時，要上多過千米高山，也一點不會覺得腳痛；即使上到山頂，也有高聳入雲、筆直的巨樹遮蔭，一點也不覺得熱（但有時犧牲了景觀） 。



山徑沿途風光怡人、美不勝收（不過也危機四伏：第一段有人跌落屎坑；我與pat也曾迷路），白天熱、晚上勁凍、早上又下大雨，有如一天內經歷春夏秋冬。第三段由環繞蘆之湖，在三國山頂眺望前方的山、山下的湖、湖水藍的天，美得筆墨難以形容。到四個check point，食了三碗熱麵暖胃，沖過凍水涼，隨即殺上難度五粒星的金時山！





經過一輪急登後，還未到山頂，但氣溫已開始驟降，寒風颯颯，煙霧瀰漫，完全看不清方圓五米，分分鐘跌落山都唔知乜事。完全無預計山上咁ｘ凍！2、3度的低溫，只得一條短褲，兩件薄風褸，結果行行下更覺得頭痛頭暈！仆街，千祈唔好病！一病就肯定玩完，咪駛旨意行得晒，兼且仲會影響隨後十多日行程！

正在盤算捱唔捱得住，駛唔駛中途退下火線時．．．嘩！好ｘ痛！撞到顆樹！但撞完後一分鐘，竟然所有頭痛頭暈無晒，好似食完特效藥一樣，所有精神返晒嚟（呢顆肯定係能醫百病的神，肯定靈過陳振聰燒銀紙作法）！經過四粒鐘，終於睇到呢個牌！！！





咁ｘ難行，稱之為天下之秀峰都當之無愧！就係個牌隔離，有個阿叔著住成寸厚咁多衫，係咁不斷揮手叫大家入屋，仲以為係到Check Point！但原來間屋唔係Check Point，係叫做「金時娘之茶屋」。呢種鬼地方，竟然仲有間茶屋，有得飲熱茶同食麵，真係好感動、熱淚盈眶！！！外面狂風凜冽，好似想吹間茶屋落山咁，屋外屋內，等如天堂同地獄！！！





好！各位隊友，飲杯茶、食過麵再衝刺！！！


（最遺憾都係，無同老闆金時娘合照！下次要同佢合照，又要再上過金時山囉。不過大家唔好咁多幻想，金時娘只係個好熱情款待的婆婆，我隊三男丁，仲幫襯佢買左個「金」字的襠布，即係相入面，道牆掛係度果塊白色，我會著住佢去布吉跑馬拉松！）



唯有下次上金時山，再搵金時娘影相，順便係塊襠布／肚兜度叫佢簽名！！！