(若大家喜歡我鏡頭下的馬拉松風景,不妨Click樂施會的標誌,資助他們的扶貧工作)

2007年6月23日星期六

富士山.紅富士之湯看紅富士

由於007隊發揮超水準表現,只用了34小時32分完成100公里的日本毅行者,星期六晚上8時多已抵達民宿休息,一覺訓到翌晨,體力精神已恢復七七八八。007隊、有三頭六臂的support的Sherin有國際車牌,唔記得邊個提議話租車,唔駛10秒,一致決定殺上富士山摸雪,享受日本毅行者的回報!

果日個天靚爆燈、好藍好藍好藍,睇見個天已經好鬼開心,睇見成座山就係前面、成個山頂到山腰一片雪白,立刻想攻上山頂!日本所有車都有GPS,唔駛驚唔識駕;沿途公路會僻多條線,讓遊客下車拍照;由山腳到海拔2300米的五合目的沿途,又有很多免費停車場。

去到「大澤駐車場」,有個阿叔賣燒魷魚同粟米,都幾多人買,400Yen一串。Sherin第一個試,評分係十級好食,於是大家一齊買,食完魷魚,就見到成班化晒粧的日本女黎咗,梗係乘機影返張相。駕到邊、停到邊、食到邊、影到邊,好舒服。

公路圍山而建,每行一段、山景及附近的景色隨之變化,遠近高低又不同。到接近山頂的奧庭有間茶屋、有間神社,但要走一段石頭路先到。真是難為貴公、要忍住膝頭條筋痛,先可以飲返杯茶;神社紅色的大島居,對比雪白的富士山,又是另一種美。

但越上越高,氣溫越來越低,得條短褲風褸都幾鬼凍!風雲也隨之變色,在山下還是萬里晴空,上到接近五合目就陰雲密佈,富士山頂已淹沒在雲海中,五合目反而最少睇頭,因為已看不見山頂,近看亦發現原來D雪中間好鬼死多泥。

五合目的鋪頭很多紀念品,連富士山的空氣都有得買,我就發現左一幅富士山鳥瞰大地圖竟然咁啱包晒,成段日本毅行者的路線!由小田原、淺間山、箱根、芦之湖、金時山、矢倉澤、駿河小山町、明神峠、三國山、明神山、山中湖全部係晒度!我地見到咁正,諗都唔駛諗即刻買,以後話畀人知行過邊,show幅圖出嚟即刻搞掂!呢幅圖真係此行最佳紀念品!(最下圖,黑線是行經的路)

我又到了小御嶽神社,用左200Yen求左支中吉簽。富士山仲有間郵局畀人寄postcard,全日本得呢度的郵chop係印富士山!但有幾個大陸客好X街,說話又大聲、又唔排隊打尖,搞到旁觀的Sherin好鬼嬲,即刻嚴詞訓斥呢班人,實在太快人心。

我們最後於5時左右落山,跟住一齊去山中湖附近的「紅富士之湯」浸溫泉兼睇日落。有富士山日落、有溫泉,先至收700Yen(即係45蚊港幣),真係抵到爛!一邊睇富士山日落,真係人生一樂也,唯一可惜是大家忘記帶鴨仔同戰艦來玩!(貴公浸完,條筋都好返好多!唔駛叫Sherin孭佢返香港)

駕埋車去餐廳、一邊食飯、一邊刨堆山梨縣的旅遊雜誌,呢日富士山之旅完滿結束。最可惜都係主筆,晨早就要返京都,結果成程都無同我地上山。貴公、Pat、主筆,若機緣巧合,不如一齊參加每年七月富士山登山比賽,一齊攻上山頂!


PS:攻上山頂一次就夠,日本有句俗語話:每人都要上富士山一次,但上多過一次係儍瓜!

2 則留言:

匿名 說...

估唔到你竟然用上一條體毛來顯示我們的百公里奮進路線.富士山攻頂計劃遲些少先算,我家陣越諗越想玩埋新西蘭毅行者呀!!---鬼腳七

匿名 說...

x毛未必有咁長,周星馳係「整蠱專家」條鼻毛,就差唔多咁長啦。

係咪去紐西蘭呀?記住等埋我,唔好早過09年去!!!你記住叫埋Sherin去呀,佢唔去,我就要拿拿林去學車啦!

版主