布吉一．聯合國海上濕身團

時間真係過得快，日本毅行者之旅還未回魂，仍然徘徊在富士山下，肉體此刻己經飛抵布吉，參加617的第二屆布吉馬拉雞。幸好有好X多假、經常被公司迫都唔肯放假、覺得六月放假有罪疚感的H哥，總於願意忍痛暫別X報七天（但為了要趕及周四返工，H哥還是決定，寧願畀多4舊水附加費都要周三機返港，都唔肯同我過多一日）。

點都好，唔係H哥慷慨相助，這個騎呢二人布吉package也不能成行，我都唔可以係呢間靚靚Laguna Allamanda Resort的Lobby

(圖左，Lobby外景觀)，一邊聽住落雨聲，一邊寫呢篇文。

布吉馬拉雞周日起跑，我有幸成為全程馬拉雞400人中、唯一一位報稱來自香港的選手，號碼報冧是6號，因為我第6個報名。係香港馬拉雞，只有D精英同世界級運動員，先可以攞到頭100號冧把，今次畀我呢D茂利攞到個6號，真係發X達，呢張號碼布都要鑲起佢！

就係跑步前兩日，我同H哥報個聯合國（有鬼、有中東、有南亞、有華人、有港燦）local tour坐船去布吉外島游水、扒獨木舟睇洞穴，風平浪靜、天朗氣清、景色優美，大賽前最佳娛樂。但我地去馬頭架Van仔遲到好多，係個酒店lobby爆完一輪粗、咒罵完一餐後的9點先出現，早知瞓晏少少好過。

之後都好順利，布吉玩水上活動多，但好少去旅行的H哥冇快乾衫、快乾褲、泳褲都算啦，但竟然連涼鞋、拖鞋都唔帶就去旅行，淨係對Addi便服鞋！佢出發前一日佢話去買（但最後冇買到），結果一上獨木舟去小島海灘、H哥先知大鑊！

D獨木舟架架濕轆轆又水花四淺，H哥一上船坐底冇耐，隻鞋已經入水。上到岸、唔識游水的H哥因為冇帶泳褲，結果連水都浸唔到，只好做塘邊鶴，順便曬衫褲鞋及幫我睇衫褲財物。其實唔游水無所謂，係岸邊睇女又得，但H哥又好正人君子，竟然自己戇XX坐埋最側邊。話晒呢個tour都有兩三個索鬼妹，身裁又得，坐咁遠睇條毛咩？

由於上親岸都要駁獨木舟，搞到又冇泳褲、又冇快乾衫褲的H哥一日濕幾次身。幸好一向極度刻苦耐勞、天天工作朝7晚11的H哥，喺唔會受呢D小小挫折打擊，絕對冇影響佢出海的興致。正因為H哥好多時專注欣賞風景，我全程好少理H哥，淨係周圍同人搭訕識朋友（可惜D索鬼妹冇個係單拖），罪疚感比H哥六月放假少D。

布吉近海的風光唔錯，小島形奇特、扒獨木舟入洞穴都幾特別，但太過靜態、乜X動物都冇。驚喜遠遠不及非洲的國家公園，我去過Botswanna的Chobe River，船上隨時可以看到河馬鱷魚出沒，有時係東、有時係西，岸上又有斑馬、猩猩、象同野鹿，睇得更加開心！

最後呢個聯合國海上濕身團係5點散檔，返酒店book埋個周日下晝SPA及按摩（跑完馬拉雞執返劑，肯定好X舒服），攞埋號碼布，同H哥係酒店吔埋晚餐，布吉第二日就咁結束！