日本毅行者之二．駿河小山町的300Yen溫泉

攻下金時山，即係等於香港行麥徑已去到沙田坳，餘下的一半易應付多了。日本第一年搞，隊伍只有176隊，到第六段「金時隧道至矢倉澤公民館」，已經在路上碰不到其他隊了，一段10公里的路，全程只看到三位其他隊的成員。

又由靜岡縣回到神奈川縣。矢倉澤是頗美的小鎮，位於神奈川縣南足柄市附近。小鎮背後是山，屋前一塊塊恭整的農田，山後面有個很大的森林公園，有點像與世隔絕的桃花園，可惜真景永遠都比照片靚得多。

休息大半粒鐘至六點，開始第七段「足柄萬葉國家公園」。起行時，天色還頗明亮，怎料一到樹林，突然風雲色變，係咁勁落雨！一落大雨先發現，原來身上呢件，所謂防水的Golite保捷行特價風褸，原來係會入水，一陣就成身濕晒！濕身都事少，所有樹林路變晒泥漿、山路兜兜轉轉（日本毅行者冠軍的消房員KK，就係呢段迷左十幾分鐘路），先至最麻煩！

可幸007隊發揮遇強越強的精神，貴公忍ｘ住膝頭條筯痛，加上主筆呢隻濕地快馬、同埋pat呢隻泥路障礙馬，係咁向前衝，落雨又慳返影相時間，一路係咁係咁向前哨，單係呢段都過爬左4、5隊頭，唯一失敗就係，我又仆多次街（可幸兩次都無仆落山，亦無受傷）。行出呢個仆街乜叉萬葉國家公園後，就是陽光普照的駿河小山町！

行左一大段石屎路，先正式去到check point、Fijimi Center！呢個check point簡直係全世界所有毅行者最好的check point，有著和服的日本婦女義工、仲有熱水涼沖同溫泉浸（費用只係20蚊港幣，可惜溫泉無得影相，無相比大家睇）！仲有湘南唔知乜叉護理專科學校的學生幫你拉筯，樓上仲可以買飯盒食！結果我地喺呢度，抖左成粒半鐘，浸完溫泉，瞓返陣，抖足精神，最後殺上終點！

成段100公里賽道，其實幾多地方可以望到富士山，第四段的三國山、第五段金時山都望到，可惜三國山多雲、到金時山係晚上，都錯失左機會（曾經一度提出，瞓到天光先上金時山睇富士山日出，唔夠一分鐘即被隊友扑低），要去到駿河小山町，先有機會第一次望到富士山！雖然淨係望到白色一忽，個景又麻麻地，但已經好好好開心，係度勁影相！