Bath Half Marathon．真係搞得衰！

今日，去了肥彭當年在英國做下議院議員的選區Bath，參加Bath半馬拉雞。話晒Bath係Unesco世界遺產，Bath半馬總有些睇頭卦？點知，呢個比賽真係搞得衰，而且係衰得好緊要，閒閒地數都數到七宗罪，令我竟然有少少，懷念業餘田總！（上圖是在這裡儲的獎牌，左是Bath、右是Barcelona）

先講題外話。唔記得聽邊個前輩講過，當年肥彭貴為保守黨主席，91年大選保守黨原本以為輸硬，但竟然出奇贏了大選，身為黨魁的肥彭，好有機會做英國首相。但肥彭衰在自己唔爭氣，竟然在Bath陰溝裡翻船！自已唔爭氣，連任失敗、保唔住個議席。結果英國首相，變左肥彭老友馬卓安做，馬卓安就安排肥彭，過來香港做末代港督。

Bath同香港的淵源就係咁，無Bath選民的選票，肥彭就唔會來香港，我地就唔會知道肥彭有兩個女咁靚，然後佢地又唔會係97年6月30日，在皇后碼頭喊到梨花帶雨．．．

返正題。第一宗罪：比賽原本11時開始，但英國這兩天狂落雨，英國不少火車都誤點遲大到，大會把比賽開始時間押後至12時。押後一小時，倒沒有所謂，但問題是Bath又落雨又凍！快些開始就快些收工，拖多一小時、準時的跑手就慘了，全部一早到現場食西北風！

第二宗罪：大會竟然揀個草地，做馬拉松放行李、註冊登記的集合點！成個場變晒泥漿，要踩到泥漿深處，才找到放行李區！還未跑，整隻鞋都是泥，襪也濕得七七八八。大佬，而家係跑半馬拉，唔係打泥漿摔角！整個好些的場地，好唔好？（所以，總要有對Goretex跑鞋看門口）

第三宗罪：有瓦借頭的地方嚴重不足，全部跑手都擠在一兩個booth度等開波，外面全是泥漿，根本無地方做熱身！

第四宗罪：竟然無T恤送比每個跑手！付了三四百蚊報名，連T恤都無件，得獎牌、包餅、朱古力同紙包飲品。簡直罪大惡極！咁鬼死cheap，仲cheap過業餘田總！(包餅仲要好難食！同埋月底就過期！！！)

第五宗罪：賽道悶死你。Bath身為Unesco文化遺產，但竟然只有一小段賽道跑舊城，大部份都在城外的核突區（超市、油站、工廠之類）！呢段仲要係重覆一次！大佬，跑半馬唔係運動場跑圈，有少少Variety好唔好？？？

第六宗罪：終點安排混亂。由終點行到行李區的通道極窄，等死你！

第七宗罪：收咁貴報名費，話晒也是英國大型賽事，有近萬人參加，但竟然唔用Chips計時，簡直好落後！無人有自己的exactly個人時間。

我最後係用了3小時1分（大會時間）完成賽事，又破了半馬最差紀錄。無辦法，左膝腳患原來未好，跑五六K已經隱隱作痛，其餘時間只好全程步行了，當是操練毅行者好了，再跑又整傷，真係成世唔駛跑！

死啦！巴塞隆那呢鋪都係傷得重，咁三個星期後的巴黎馬拉雞點算？？？