(若大家喜歡我鏡頭下的馬拉松風景,不妨Click樂施會的標誌,資助他們的扶貧工作)

2007年9月26日星期三

倫敦七.終於要投降

吹氣床引來如此多遐想,怪哉怪哉。

張吹氣雙人床是寄居屋主友好Patrick的,專方便香港朋友上他家屈蛇用,張床連氣泵都要3、40鎊,但都幾舒服。Patrick明年一月很大可能調回香港工作,張床由我接收了,明年友好屈蛇,就有吹氣床訓了。

倫敦一程地鐵,最低消費是港紙20蚊,由zone1去zone2,是藍田到旺角的距離,已要收32蚊,一日交通費閒閒地也要5、60元(每日九時半後入閘後,交通費上限是78元),去不同店鋪買很普通的日用品,若不格價,分別可以相差幾蚊至十幾廿蚊港紙不等。今日原本中午去接我大佬,因為呢條cheap精想慳程地鐵,行左三個地鐵站,搞到我大佬係火車站等左25分鐘、好X谷氣。

但事後孔明,其實呢程根本無必要慳,因為今日完來有人call約食飯,又要整多兩程,最後也要坐78元,千計萬計、日日練毅行者,但最終其實可以係乜都無慳到。而且往往為左慳返兩蚊,又會做好多更唔理性的決定,例如:今日約了人食飯,但坐車去到才發現,人家搞富貴餐,去倫敦的City Super級的貴價超市掃貨,而且開得飯來也要九點!

加上剛剛才交左兩皮幾宿費,每月資助仍有排未到手,若下月要找卡數仍未有資助就大煲,由香港電匯錢又蝕手續費,反正前日先訓得三粒鐘,不如返宿舍自己煮、上網及早抖好過,結果竟然臨時係鬆人返宿,連中秋節都唔慶祝。搭左兩程車唔知做乜,一場去到又唔食,諗返都幾白痴。

日日左計右計,真係要用好多精力。所以,連我呢條Cheap精,今日終於要投降!真係要承認,我而家係住在倫敦,不是住在香港。

今日正式註冊了。下周要揀科,好多好有趣的科,例如:伊朗電影、中東電影與社會、中亞政治、以色列巴勒斯坦及阿拉伯世界、埃及敍利亞建築、土耳其帝國及巴爾幹半島、法國殖民北非史...科科都好好聽,但要揀實在揀唔落手,因為驚讀唔掂,所以最好還是先問清楚教授,我乜X都唔識,會唔會肥佬?我科Major是Modern Trend in Islam,我都好想改返以色列巴勒斯坦,至少聽落去容易些。

明天無戰事,可以大休、做雜務、及煮食了。現在天天上網,就好像將香港搬來倫敦一樣,但不上網,又無辦法與倫敦的人聯絡!

2 則留言:

匿名 說...

喂,中秋節快樂噃!
唔係唔好算,但好心你唔好成日算到咁盡啦,死幾多腦細胞丫,順其自然啦!

fai

匿名 說...

莊氏︰
成日算到咁盡,好快衰老㗎!(只係衰老,但係又唔會死嗰隻!!)好好享受在倫敦的日子好過啦!在倫敦,搭地鐵都可以有好多份免費報紙任揀,內裡又多新聞、多資訊(包括科學嘢!),好睇過香港嗰啲呀!
我今日開咗人罐花街朱古力,好好味,諗番起,對上一次食,仍是六、七歲的時候。多謝晒!
pk