(若大家喜歡我鏡頭下的馬拉松風景,不妨Click樂施會的標誌,資助他們的扶貧工作)

2007年7月30日星期一

也門二.原始粗糙、未受旅遊污染的地方



經過近20小時飛機、轉機、等轉機,終於到達也門首都Sanaa。終於發現有民族的衛生程度,比中國人還要衰,坐在我前面的那個也門人,整程都在機上咳,臨下機前甚至不斷向機艙地下吐痰及吐口水!這輛飛機極之新簇,但就這樣被「摧殘」,實在令人極度嘔心!

Sanaa機場極度簡陋,贊比亞Livingstone機場比它還要先進,明明入境處網頁說入也門不用簽證,但原來不是這回事,結果要花25美金補辦簽證,期間遇到兩個中國當地使館人員,一人話也門真係幾差,又話學阿拉伯文都無乜用,覺得眼前呢條友,山長水遠來也門學阿拉伯文,係有點不可思議!

於課程未開始、兼且學校其他相關住宿爆了,暫時未搬得入宿舍,我與其他三人(英國仔William、美國中年女人Tracy及摩洛哥裔法國人Yusif)在學校安排下先住兩晚酒店。William在英國Durham U修讀阿拉伯研究;Tracy有興趣學阿拉伯文,學懂了還可以加入美國國務院,因為美國需要相關人才;在巴黎出生的Yusif本身已懂阿拉伯語,希望學深入些。

William的老豆在劍橋大學教化學、有個也門學者朋友,知道William會與這位也門學者食午飯,我梗係立即掹衫尾跟埋一齊去,識個也門學者都好!這位老教授在Sanaa大學教Zoology,他與另一位來自捷克的科研人員,請我們擦餐勁,食了上好的地道也門餐,席間又跟我們簡單介紹也門情況。

Sanaa又是也門最大城市,古城區早於十多年前,被Unesco列為世界文化遺產。城市建築特別,都是由泥和磚所建,牆外塗上厚厚的白油漆,粗獷的質感與梵高的油畫一樣。有些建築的窗用彩色破璃,晚上會照出不同顏色的光芒,大部份建築的歷史也相當悠久,舉例說,我讀的語言學校Sial (Sanna institute of Arabic Language)的那幢五層大廈,本身已有超過400年歷史。

Sanaa古城不是耶路撒冷,沒有突出的建築、甚至連景點也沒有,但這種原始、沒有經過現代加工、沒有任何堆砌的古樸簡單,在其他地方也難以找到。一邊留心慢慢欣賞,看看每一幢泥建築的設計、顏色及質感有甚麼不同,一邊在彎彎曲曲的小街踱步,看看當地人買甚麼東西?有甚麼貨品最好賣?已可以消磨大半畫。

到也門旅遊畢竟是小眾玩意,Sanaa的不食旅客煙火,就是你既找不到遊客中心、甚至連一張完整的地圖也很找到、若不計學阿拉伯文的同學,遊客也是小貓三四隻。酒店給我那一張殘缺不全、街道名的字體比針孔還細,就連職員也不能在地圖中,找到酒店的位置,要形容這種地圖,都係呢一句:「攞黎敏屎都嫌硬!」

東不乏靚女,電視娛樂節目主持、半島電視台的女主播,比香港質素都好。最可惜是,無法知道也門女人漂亮不漂亮,因為也門是極度保守的國家,所有女人全部蒙黑面紗,只會露出一線眼睛。要識一個也門靚女,可難過登天呀!

阿拉伯文一樣好難學,發音極難。來這裡學的外國人,大多數都懂簡單對話,大學本科修讀中東或阿拉伯文,對中東也十分熟識,由零開始的只是少數。開始要擔心,九月開學會後將極之吃力!

蒙面紗是甚麼道理?若看不到女人乜樣,男人又怎樣睇樣溝女?稍後再談。

7 則留言:

飛的進行式 說...

蒙面紗點樣溝女?我都好有興趣知道!哈哈..要寫詳細啲啊!
衛生習慣呢樣嘢果然係隨著城市的發展程度而定的,查實果位由坐飛機一路咳的人士,會唔會好似台灣果對公婆咁架哩!真得人驚....

匿名 說...

你有冇入鄉隨俗用手拿飯食呀?你對面紗咁有興趣,你不妨多留意中東婦女近乎清一色的黑紗衣服,其實佢地好講究架,我去過巴林的黑紗舖,果度D女人揀件黑紗都可以揀好很耐架,你同我覺得一尻樣,佢地就覺得好多變化咁囉.

匿名 說...

佢地有無自由戀愛呢回事?因為好多中東國家都係由父母包辦,仲要唔好做出有辱家聲的事,佢地有一種文化好似叫honor killing,即係如果個女有辱家聲,例如唔理父母私定終身,係可以因為有損家庭聲譽而被殺的.

我好想知佢地的黑紗幾多錢一幅?要著幾多層係身?仲有,同也門學者一齊食飯的大餅,真係好好好好...大丫!

唔該版主可唔可以解答我的問題?

fai

匿名 說...

hi, wai gor, it's cindy from Next ar. Great to see your website, full of adventurous experience. It’s really cheer me up while researching on the bored and complicated medical topic in the prison-like office.

Looking forward to your interesting stories in Yemen and UK!

匿名 說...

Fion,果條友真係恐怖,好彩我到而家都無事!

用手食飯肯定肚痛,就算唔用手,個肚有時都唔係好舒服。係呀,其實中東都好多黑紗、同女人衫賣,每件都係有些少不同,買返件扮女人,肯定無人識辦到。

Fai。聽當地人講,都係有自由戀愛,但報紙話有好多近親繁殖。個也門學者話,呢度係可以娶多個老婆(但有幾多人係咁,真係唔知囉)。

至於honour killing,其實唔係伊斯蘭教教義,只是扭曲了的集俗。至於乜可以死,我都睇過話,通姦是可以死刑(被石頭擲死),再研究下先可以答。

我問過同班的法國女仔,佢買左一套,由頭包到腳,講價後約是20蚊美金。通常係一層,頭就兩塊布,一塊包頭、一塊包面。

個大餅真係好能大!最後梗係食唔晒。

Hi Cindy, welcome! Wish you like it.

上網好鬼慢的版主

匿名 說...

幾條友就係咁食個大餅就當一餐,一定食到口淡淡...真係想死.

用手拿飯食好正架,感覺就好似沖完涼唔著衫走黎走去一樣,要快d試下啦.

馬拉松之花

Chong Hiu-yeung (莊曉陽) 說...

The big big big bread is just one dish, we have meat, 2 large fishes, fruit and desert!